Мардин дестинација што плени

  • 29.12.2021
  • Вести, Приказни
Мардин низ историјата уште од пред 5000 години ја отворил својата прегратка на различни цивилизации. Градот се наоѓа во Југоисточноанадолската област на Турција со поглед кон Месопотамија помеѓу реките Тигар и Еуфрат. Според сирискиот јазик Мардин значи тврдина.
Овој турски град е еден од најразличните кои што би можеле да ги видите воопшто. Како колевка на многу цивилизации е познат по својата фасцинантна архитектурa (стари џамии, медреси, музеи, карактеристични куќи и кули). Уништената римска тврдина, обновена во средновековно време, го крунисува врвот на планината како доказ за претходното постоење на Мардин како Марида (Марде, Мариде, Мерида) уште од антиката. Марида бил преземен од Турците Селџуци кон крајот на 11 век и бил инкорпориран во Отоманската империја од страна на султанот Селим I во 1516 година.



Во Мардин се снимени многу турски серии и филмови, а во мир и тишина со векови живеат луѓе од различни вери и култури кои зборуваат различни јазици. Овој историски “скапоцен камен” е дом на мноштво националности, вклучувајќи турци, курди, ерменци и сиријци кои живеат мирно и покрај нивните верски разлики. Градот се наоѓа на листа на УНЕСКО за заштита на светското наследство.
Мардин привлекува внимание со неговата својствена архитектура, а своите посетители ги води во мистичното минато на истокот кое буди љубопитност.
Традиционалните куќи на Мардин докажуваат дека урбаната текстура на градот може да биде неверојатна. Крeмовите  камените куќи на Мардин не се дом само на локалното население, туку тие се домаќини и на самата историја. Бидејќи се наоѓа во вулканска област, основниот материјал што се користи во локалната архитектура била лесно обработливата варовничка карпа. Куќите во Мардин, кои ги одразуваат сите карактеристики на затворениот животен стил, се опкружени со ѕидови високи 4 метри, изолирани од улицата. Овие ѕидови обезбедуваат и заштита од суровите климатски услови. Најважната карактеристика на овие куќи е изработката на каменот, вратите, прозорците и малите столбови се украсени со сводови со различни мотиви.  Шетајќи низ тесни улички и улици со калдрма, разгледувајќи ги кремовите куќи изградени од варовник декорирани со релјефни резби на животни и плодови ќе имате чуство како да сте во некој сон  далеку од модерниот свет.  Над вратите на куќата се издлабени слики од Каба ако сопственикот отишол на аџилак во Мека, а чукалчињата на портите имаат карактеристична форма налик на клунови од птици. Сириските православни ковачи на злато и сребро, чија работа е позната низ целата земја, сè уште го практикуваат својот занает овде,а нивните работилници се рамо до рамо со оние на муслиманските бакарни ковачи.
Мардин има мешавина од две клими. Климата на градот се менува помеѓу континентална и медитеранска. Поради географската положба на градот, зимските месеци се прилично студени. Најстудениот месец во сезоната е јануари. Најпогодно време за посета на Мардин би било пролет или есен. Ако го посетите Мардин во јуни, можеби ќе имате шанса да го доживеете Меѓународниот фестивал на црешата.


 
Не само архитектурата и урбаната текстура, туку и кујната на градот е инспирирана и збогатена од влијанието од Патот на свилата и многу култури. Поради локацијата на Мардин, источната и западната кулинарска уметност се комбинирани на највкусен начин. Мардинската кујна не е позната само во Турција, туку е позната и низ целиот свет.



Секогаш е прекрасна идеја да купите уникатен и традиционален подарок за пријателите и семејството. Познатиот сапун на Мардин би бил одличен сувенир или подарок. Ако сакате да понесете нешто вкусно, може да размислите да купите колбас од орев (направен од цели јатки орев и  желе од грозје).
Искусувањето на различната атмосфера на мардинските чаршии е задолжително. Случајните продавници и места лоцирани во тесните улички на овој сјаен град ќе ве фасцинираат, а античките историски  предмети и вкусната храна ќе ги збогатат вашите впечатоци од градот Мардин. Во овие чаршии можете да купите се што ќе посакате. Мештаните на Мардин се доста талентирани кога станува збор за рачно изработен накит.
Ноќниот живот во Мардин се состои од кафулиња со жива музика и барови, каде што луѓето ги пеат традиционалните песни додека јадат и разговараат. Како круна во целата приказна на овој град со волшебна убавина  е прекрасниот залез  кој може да го уживате со кафе, чај или вино во некој од локалните барови со тараси на покривите.

Галерија